有片.我係黑社會│紋身漢搭霸王小巴遭拒 勒索站長1000元被捕

青衣寮肚路長宏邨小巴總站昨發生自稱三合會成員勒索金錢案,機警站長臨危不亂,拍下對方勒索1,000元過程。片中一名姓盧(40歲)紋身漢,自稱阿峯,穿上帶點污漬又穿窿的白色短袖T恤,踢着拖鞋走進站長室,向姓王(48歲)站長投訴較早前被小巴司機拒搭霸王車,更自稱是黑幫新義安「顏成嘅細佬」,解釋拒付車資原因:「你唔係淨係侮辱緊我,仲侮辱我大佬,侮辱緊我嘅單位」。

片段開頭即見阿峯握着手機走進站長室,劈頭就說:「我係成哥啲細佬,司機都唔會收錢,大家都識我,我成日喺度同成哥傾計」,王表現愕然,不明他意思,阿峯即補充:「我係佢黑社會啲細佬」,王問:「邊度黑社會」,他即說:「新義安」。

有人更大條道理說:「我今日響得成哥個朵,你係咪都應該畀番啲面我」,王反駁:「畀乜面?你上車就要畀錢,你黑社會唔駛畀?」阿峯則解釋:「幾蚊車錢,我唔係搭唔起……你咁做,唔單止踩我,連我個單位都冇面」。

「畀一千蚊,大家攞個意頭」
王假扮就範,暗中盤算蒐證及報警,讓對方以為自己屈服。阿峯其後直接勒索金錢,另一段片則見他說:「畀一千蚊,大家攞個意頭」,阿峯一再重申:「你唔係淨係侮辱緊我,仲侮辱我大佬,侮辱緊我嘅單位」。他又吹捧「顏成」是幫中地位舉足輕重:「紮職……,要佢主持」。其後又提及:「我阿公叫細超,係屯門新義安。」

王拍下證據後,即偷偷報警求助,警方到場調查後,以涉嫌勒索及自稱三合會成員拘捕阿峯,案件交由葵青警區反三合會行動組跟進。有反黑組警官透露,沒有聽過案中男子提及的「顏成」人馬,而「細超」應該年過七旬,退隱江湖逾30年。


自稱阿峯的紋身漢聲稱:「我係成哥啲細路,司機都唔會收錢,大家都識我,我成日喺度同成哥傾計」(網片截圖)


阿峯手臂紋身,向站長勒索1000元斷正。(網片截圖)


長宏邨小巴總站昨發生勒索案。(楊嘉朗攝)


疑犯疑不滿小巴司機收取車資而自稱黑社會成員。(楊嘉朗攝)

You May Also Like

Comment

Khu Đô Thị Hưng Hoà TNR Đồng Văn